دي مش أستغاثة ولا مناجاة.. أنا مش عارفة ده أيه.. ومش مهم أعرف ولا مهم تفهم أنت كمان

أنا واقفة ف مكاني مش بتحرك.. لأ متعبتش.. أنا بس واقفة باخد نفسي..

واقفة ف هدوء.. سما صافية والجو البرد... واقفة بدموع جويا محبوسة..

مش حاسة اني عايزة أعمل حاجة غير اني أفضل واقفة شوية.. 

هما بيقولوا اني المفروض مرجعش لورا وان لازم اتقدم.. بس أنا مش برجع لورا.. انا واقفة ف مكاني..

مش من حقي أختار ده؟

مش من حقي أختار اني أهرب شوية وأختفي عشان أعرف أتنفس؟

بيطلبوا مني اني أعمل حاجات أنا مش حساها.. لمجرد انها هتفرحهم.. هما.. طب وانا؟ 

أنا هنا ومش هنا.. جزء مني عايز يبقي هنا وجزء تاني عايز يبقي هناك..

مع اني معرفش هناك هيبقي فيه أيه..

بس الفراق وحش.. وحش أوي

الفراق بيخلينا نعمل حاجات من غير ما نحس.. ونقول حاجات من غير ما نفكر..

بيقولوا ان الواحد بيتعود علي الفراق.. هما.. لاكن أنا مش قادرة أتعود..

انا مش لاحقة حتي أخد نفسي عشان ألحق أتعود علي فراق الحبايب اللي بيمشوا ورا بعض..

أنا كل اللي عارفاه اني راضية.. مش زعلانة من حكمته عشان انا مؤمنة..

زعلانة عشان خايفة.. خايفة عشان مش عارفة ايه اللي هيحصل بعد كده..

أنا حابة أفضل واقفة شوية.. لوحدي.. حابة أفضل واقفة مكاني بتفرج علي السما..

ف متقوليش أعمل ايه وبلاش أيه.. متفكرش اني مبسوطة ف مكاني ده.. 

بس أنا مش شايفة مكان غيره دلوقتي..

31-5-2013

9:22 PM