ساعات ببقي نفسي أجي أقولك تخدي رجلي تمشي بيها, تقفي بيها وتقعي بيها.. نفسي أمشيلك وأتعب مكانك.. أقول أه بدالك
زعلانة عشان عارفة أنك زعلانة ,بخاف لخوفك, وبعيط بمجرد ما أشوف دموعك
يلعن المرض اللي يخليكي تقعدي تفكري هتمشي ونسيبينا أمتي
يلعن أي حاجة تخلي أي حد عايش بيفكر ف معاد موته
يلعن الوجع.. بجميع أشكاله
كان نفسي اخدك من ايدك ونروح مكان غير المكان
حياتي كلها بتتلخص ف لحظة.. لما أنام ف حضنك وأسمع ضربات قلبك.. نفس.. روح
نفسي أوفيلك حقك بس عارفة اني مش هعرف
نفسي أقولك حاجات كتير أنا عارفة اني مش هقولها
نفسي منفكرش.. منزعلش.. منتكسرش
ننام ونطبطب علي بعض بروحنا
نصحي مش شايلين هم وجعنا
نفسي نفرح.. نحلم.. نرتاح..
تعبت من السؤال.. لحد ما رضيت
وعرفت انه لازم نحسن الظن بالله.. وأن بالثقة واليقين كل حاجة هتبقي كويسة
بالدعا..
هو الوحيد اللي هيسمعني..
No comments:
Post a Comment