:)

مالك؟ أنا كويسة والله فعلا كويسة… كويسة من بتاعتهم ولا كويسة من بتاعتنا.؟ كويسة بجد الحمد لله.. بس صعب أوي فكرة أن حد ممكن يمسحك من حياته بسهوله كده.. إحساس إني كلمة أتكتبت غلط في كشكول المدرسة… معنديش مشكلة أنهم يمشوا حقيقي بحاول أسيطر علي فكرة أنهم وحشني علي طول.. بس أنا عندي مشكلة أنهم يمشوا ويعاملوني معاملة خرا بعدها من غير أي سبب.. أويلغوا وجودي.. بس أنتي عارفة أن احنا كلنا بنلف في نفس الدايرة وعارفين نهاية البداية وبنستهبل صح؟أيوة أنا عارفة.. أنا عارفة أن كل واحد بيقدم رسالة ومسيره هيمشي.. أنا فعلا كويسة.. ومش بكدب أنا بس مبقتش عارفة أقول أيه.. باجي أتكلم.. أسكت ومفيش حاجة بتطلع مني ومبسوطة بالحالة دي.. عارفة أحلي حاجة أن الواحد يبتدي يقلل من كل حاجة/حد حواليه وياخد جرعات صغيرة من كل حاجة.. وأصلا كون أنك تتوجعي لو حد مشي من حياتك أو أنك تقولي مش هقدر أعيش من غيره يبقي أكيد الشخص ده أخد المكان الغلط في حياتك مكان اللي خلقك وخلقه.. مش كده؟.. عارف أنا أصبحت شبه متأكده إني هموت وأنا لسه معرفش إجابات الأسئلة اللي كان ممكن أعرفها بسهولة بس أنا اللي رفضت أسأل أي حد تاني غير نفسي.. بس أنا متأكد أنك بتحاولي.. أه بحاول.. اصلا كل الناس اللي هنا نفسهم يبقوا مكان الناس اللي هناك, ميعرفوش أن الناس اللي هناك بيلعنوا أنهم هناك.. مش مشكلة هنا ولا هناك أهم حاجة أن حضن ماما لسة موجود ولو أنا مشيت أو حضن ماما مشي أنا متأكده أن ربنا هيطبطب علينا لحد ما يجمعنا في حياة أخري.. لسه بحاول وهفضل أحاول السنة دي بدأت بموت أقرب حد لقلبي وناس كتير أختارت أنها تمشي من حياتي بمزاجها ومع ذللك أنا مش بكرها.. لعله خير